Våryre skruknøttar!

Måndag 10. mars var dagen då vinteren hadde rista av seg sine verste krampetrekningar og våren stakk hovudet inn døra. Langs Lille Lungegårdsvann hadde anleggsarbeidarane fjerna forekvistane, og krokkusen hadde strekt seg mange centimeter opp mot himmelen. Kvikksølvet låg å flørta med tiaren på måleapparatet som fortel oss om det er ull er bar hud som er anbefalt klesdrakt. Fleire av dei oppmøtte (Hans Olav, Andreas, Anders, Arne, Arild, Vegard og Erlend) vart både klamme og svette grunna for mykje klede.
Som ein kan sjå var det sju knøttar som stilte på trening i går. Dette ser ut til å ha utvikla seg til ein trend, noko eg tykjer er beklageleg. Tre mot tre er forsåvidt greit, men då hadde det vore betre om me klarte å skrapa saman ni spelarar og spelt med tre lag. Dessutan er me no svært sårbare for fleire fråfall. Det bør difor diskuterast om ikkje me skal henta inn ein ekstra knøtt på fast basis, så me slepp å henta inn ekstra krefter frå gong til gong. Kom gjedna med innspel på dette.
Ein annan sak som må avklarast snarast er om dykk ynskjer å stilla med lag til Tysnescup i sumar. Det gjeld helga 4.-6.juli. Eg har alt fått tilbod om å bli med eit anna lag, og ynskjer å takka ja til tilbodet dersom ikkje knøttane skal stilla. Men eg har tidspress på meg, så om ikkje dette kjem på det reine ganske snart kjem eg til å binda meg til det andre laget. Det beste for meg er om knøttane satsar på Dahle også i år, så klarer eg å snika til meg to cupar:).
Elles var kvaliteten på gårsdagens trening heilt på det gjamne, synest eg. Utan dei store høgdepunkta, men også utan dei store lågpunkta. Med andre ord så har me meir inne. Det er bra, då me ikkje skal vera i toppform før sumarvindane feier over Sverresborg.

Erlend